སྨྱུང་གནས། མངོན་མིན་ཤུལ་བཞག་རིག་གནས།
【ངོ་སྤྲོད།】སྨྱུང་གནས་ནི་ཡན་ལག་བརྒྱད་པའི་ཐེག་ཆེན་གསོ་སྦྱོང་དང་འབྲེལ་ནས་སྲུང་བ་ཆེས་མང་བས་དེ་ལ་བསྙེན་གནས་ཀྱི་ཐ་སྙད་འདོགས་པའང་ཡོད་ཀྱང་དེ་ནི་མ་གོ་བའི་བརྡ་ཞིག་སྟེ། སྤྱིར་སྨྱུང་བར་གནས་པའི་དོན་ནི་ཟས་སྐོམ་བཀག་སྟེ་ལྟོགས་པར་གནས་པའི་དོན་ཡིན་ནོ།། ས་ག་ཟླ་བའམ་བོད་ཟླ་བཞི་བའི་ཚེས་བདུན་ཉིན་སྟོན་པ་ཤཱཀྱ་ཐུབ་པ་སྐུ་འཁྲུངས་པའི་དུས་ཆེན་དང༌། ཚེས་བཅོ་ལྔའི་ཉིན་ནི་ཁོང་ལྷུམས་སུ་ཞུགས་པ་དང་སངས་རྒྱས་པ། ཡུལ་རྩ་མཆོག་གྲོང་དུ་སྐུ་མྱ་ངན་ལས་འདའ་ཚུལ་བསྟན་པའི་དུས་ཆེན་སུམ་འཛོམས་ཀྱི་ཉིན་མོ་དང་། གཅིག་ནས་ང་ཚོ་ནང་བ་སངས་རྒྱས་པའི་ཆོས་ལ་དད་པ་བྱེད་མཁན་རྣམས་ཀྱིས་སྟོན་པ་ཤཱཀྱ་ཐུབ་པར་གུས་བཀུར་དང་ཁོང་གི་བླ་ན་འཕགས་པའི་མཛད་རྗེས་ལ་རྗེས་དྲན་ཞུ་བ་དང༌། གཉིས་ནས་རང་གིས་ཀྱང་དུས་ཆེན་ཁྱད་པར་བ་འདི་ལ་བརྟེན་ནས་ཁོང་གིས་ལམ་སྟོན་གནང་བའི་གདམས་པ་ཟབ་མོ་ཉམས་སུ་བླངས་ཏེ་ཚོགས་གསོག་སྒྲིབ་སྦྱོང་བཟང་བོ་ཞིག་བྱེད་འདོད་ཀྱི་བློ་ཤིན་ཏུ་བརྟན་པས་ཉམས་ལེན་བྱེད་པ་དང་། ཉིན་འདི་དག་ཏུ་རབ་བྱུང་བ་དང་ཁྱིམ་པ་ཕོ་མོ་རྣམས་ཀྱིས་ཐེག་ཆེན་གསོ་སྦྱོང་བླངས་ཏེ་སྨྱུང་བར་གནས་པའང་ཡོད། སྤྱིར་སྨྱུང་གནས་ནི་སྨྱུང་པར་གནས་པ་སྟེ་ཟས་སྐོམ་མི་སྤྱོད་པར་བསམ་པ་ཁྱད་པར་བས་ལྟོགས་སྐོམ་གྱི་དཀའ་ཐུབ་ལ་གནས་པའི་དོན་ཡིན། དེ་སྲུང་པ་པོ་ལ་མི་རྣམས་ཀྱིས་སྨྱུང་གནས་པ་ཟེར་ཞིང་། དུས་ནི་སྔར་གྱི་དུས་ཆེན་ཁྱད་པར་དེ་དག་གིས་མཚོན་སྐྱེས་ཆེན་དམ་པ་དག་གི་འཁྲུངས་འདས་དང་། རླབས་ཆེན་མཛད་པ་མཛད་པའི་ཚེས་སྤྱི་དང་། ཟླ་བ་བྱུང་ངོ་ཅོག་གི་ཉ་སྟོང་བརྒྱད་གསུམ་སོགས་བཟང་བར་བཤད། སྨྱུང་བར་གནས་ཡུན་གཅིག་ལ། ཉིན་གསུམ་དུ་གནས་དགོས་པ་ཡིན། དེ་ཡང་ཉིན་དང་བོའི་གུང་ཚུགས་ཀྱི་ཟས་གྲུབ་ནས་ཉིན་དེའི་མཚན་ཐུན་དང་པོའི་མཐའ་ཚུན་ཆད་དུ་རུང་ཇ་ཞེས་པ་རྒྱུ་དུས་རུང་གི་འོ་མ་ཆུའམ་ཇ་ཁུ་དང་མཉམ་བསྲེས་བྱས་པ་དང་། ཤིང་ཏོག་གི་ཁུ་བ་ཡིན་ཡང་རུང་འདམ་བུ་ཉག་མའི་མདོག་ལྟ་བུ་ཅུང་ཟད་སླ་བ། ཚགས་ལ་བཙག་པ་རུང་ཆུ་བཏབ་ཏེ་འཐུང་རུང་ཡང་། ཉིན་གཉིས་པ་དང་གསུམ་པའི་ཡང་ཐོ་རེངས་པར་ཆུ་ཕར་ཟད་ཐ་ན་རང་གི་མཆུ་མའང་མིད་མི་ཆོག་པར་གསུངས། ཉིན་གཉིས་པ་དང་གསུམ་པའི་ཐོ་རེངས་པར་ངག་བསྡམ་དགོས་ཀྱང་མ་ཎི་སོགས་བཏོན་ན་དགེ་བ་ཡིན་གྱི་སྐྱོན་མིན། ས་ཆ་ལ་ལར་ཐུན་གྱི་དུས་སུ་དོན་དག་གལ་ཆེན་ལ་ཐུག་དུས་ཁ་ཕྱེས་མ་བཙུམ་གྱིས་ལྡབ་ལྡིབ་ཀྱིས་སྨྲ་བའང་ཡོད་མོད་དེ་ནི་སྲུང་ཚུལ་མ་ཤེས་པའི་སྐྱོན་ཡིན། སྨྱུང་གནས་ལ་མི་རང་ངོས་དང་གཞན་སྐུལ་གྱིས་ཞུགས་པའང་ཡོད་ལ། ད་དུང་ཚོགས་པ་འདུས་ནས་ཉམས་སུ་ལེན་པའང་ཡོད་དེ། དཔེར་ན། ཨ་མདོའི་ཀན་ལྷོའི་ས་ཆ་ལ་ལ་དང་མཚོ་ལྷོ། རྨ་ལྷོའི་ས་ཆ་ལ་ལར་ལོ་རེའི་ཟླ་བཞི་བའི་ཚེས་བཅོ་ལྔ་དང་དགུ་བའི་ཉེར་གཉིས་ལ་ཁྱིམ་རེ་ནས་ཁྱིམ་སྲུང་ངམ་ནོར་ལུག་འཚོ་བའི་མི་གཅིག་གཉིས་མ་གཏོགས་ཚང་མ་ཁོ་རང་ཚོའི་དགོན་པའི་འདབས་སུ་སྒར་བཏབ་ནས་སྐྱ་སེར་དུས་གཅིག་ཏུ་སྨྱུང་བར་གནས་པ་དང་། ཡང་ཡུལ་ཁག་ཕྱོགས་འདུས་ཀྱི་སྔགས་ཁང་ངམ་མ་ཎི་ཁང་སོགས་སུ་དགེ་འདུན་པ་བཞི་སོགས་སྤྱན་དྲངས་ནས་ཐེག་ཆེན་གསོ་སྦྱོང་ལེན་པ་སྔོན་དུ་སོང་ནས་འཕགས་པ་ཐུགས་རྗེ་ཆེན་པོའི་ཆོ་ག་དང་འབྲེལ་བའི་སྒོས་མ་ཎི་དུང་སྒྲུབ་དང་སྨྱུང་གནས་སྲུང་བ་སོགས་སྔོན་གྱི་ཕྱག་སྲོལ་བཟང་པོ་མ་ཉམས་པར་རྒྱུན་གནས་ཐུབ་པའང་ཕྱོགས་གང་སར་མཐོང་རྒྱུ་ཡོད་པ་དེ་དག་ནི་བསྔགས་པའི་འོས་སུ་སྣང་ངོ་།། སྨྱུང་གནས་ཀྱི་གུང་ཚུགས་ཀྱི་ཟས་ལ་ཞོ་དང་འོ་མ། གྲོ་མ་དང་། འབྲས་སིལ། རྒུན་འབྲུམ། ཀ་ར་སོགས་ཞིམ་མངར་འཛོམས་པའི་དཀར་ཟས་སོགས་འཛོམས་ན་རབ་དང་། དེ་མིན་ཡང་དམར་ཟས་དང་། ཙོང་སྒོག་སོགས་གཏན་ནས་མི་རུང་བ་ཡིན། སྨྱུང་གནས་ཀྱི་ཉིན་གསུམ་པའི་ཐོ་རེངས་ཀྱི་དུས་སུ་ཐོག་མར་འཕགས་པ་ཐུགས་རྗེ་ཆེན་པོའི་ཆོ་གའི་སྒོ་ནས་སྒྲུབ་པའི་བུམ་ཆུ་ཀ་ར་དང་མཉམ་བསྲེས་ཀྱི་ཆབ་ཉུང་ཙམ་འཐུང་རྗེས་ཐོར་ཐུག་འཐུང་བའི་ཕྱག་སྲོལ་འང་འདུག། དེ་ཡང་བསང་ཆུ་རྫོང་གིས་སྨྱུང་གནས་དུས་ཆེན་མངོན་མིན་ཤུལ་བཞག་རིག་གནས་ཀྱི་གྲས་སུ་བཞག་ཡོད་པ་བཅས་སོ།【娘乃节简介】 娘乃节，意为“禁食斋守饥行”，是夏河县非物质文化遗产名录之一。信仰藏传佛教的甘南藏族在每年农历四月十四、十五日，为纪念佛教创始人释迦牟尼的诞辰与成佛、涅槃，进行斋戒， 即少食、禁语。在这两天的日子里，不论男女，都着新装，前往寺院顶礼膜拜，转经轮、念嘛呢、上布施。之后进行娱乐活动，如看藏戏等。
发表评论 取消回复